حبيب نينو

الحياة ألي حيعيشها الأنسان علي وجه الارض إلى مماته حتكون طويلة بس سريعة وبطيئة في العلاقات الاجتماعية ، في مراحل بقاء الانسان علي وجه الارض وخاصة من عمر 8 إلي 20 حيبحث الانسان عن الصديق ألي يشاهد فيه في الرسوم المتحركة الصديق ألي تكونو انتم الزوز طول العمر كمثال أصدقاء كونان هههه او صداقة غون وكيلوا حتبحث عن الصديق هذا لدرجة أنك تفقد الأمل في وجوده والسبب في ذلك مايفهماش الطفل في صغره وفي ألي يكون في سن الرشد ومالاحظش السبب وألي هو أن الطفولة تنتهي في حياة الواقع أما في الرسوم المتحركة فلا ، كمثال رسوم كونان ليهم اكثر من 15 سنة وغون وكيلوا في القناص نفس الموضوع قاعدين اعمارهم 12-15 ، انتا وقت يكون عمرك 10 سنين تحضر في القناص يعجبك معني الصداقة الموجود يين غون وكيلوا وتقعد تبحث عن كيلوا متاعك او غون متاعك لاكن تتفاجاء ان مش موجود لي توصل لي 25 سنة مثلا تقتنع وتقول أن مافيش صديق زي هكي ( مرات تقولها بنبرة أولاد سليم اللبنانين – مافيش صاحب بيتصاحب 😀 ) والسبب من صناع الرسوم ألي اوهمو الاطفال ان في صديق يقدر يكون صديقك طول العمر وهما مخليين الشخصيات مايكبروش باش مايقفش ربحهم لان كان كبرو الشخصيات يجيهم يوم ويموتن الشخصيات هذي وهذا ماهوش دخل مستدام ليهم وفي نفس الوقت الشيء هذا ليه تأثير سلبي علي الاطفال ويقع علي عاتق صناع هذي الرسوم
من المفترض ان الطفل بعد يوصل لي سن الرشد لازم يكتشف ان مافيش صديق دائم او بمعني اصح مافيش صديق انت وياه تكونو مع بعضكم مدي الحياة انتا في النهاية حتكبر وانتا في النهاية انسان وحتسلك مسلك الانسان الطبيعي وانتا اصلا لما تكون طفل ماتتحكمش بقررات حياتك او معيشتك لانك فرد في اسرة والاسرة هذي مرات تنتقل او تسافر كلا حسب ظروفه او قرارات الاب وهذا من اول نقائض قاعدة الرسوم ، وبعد هكي انتا كل ماتكبر حتتغير عليك المدرسة والاصدقاء في الي يبهرك وفي الي تبهره وبعد تخش للثانوية يزيد يتغير تفكيرك ومن التانوية تكتشف ان في حاجة اسمها خبث ومصلحة ومرات حسد تتزيد تتسع الفجوة وبعدها الكلية ضغط دراسة وزيادة الالتزامات العائلية بسبب سن الرشد وبعدها تتخرج وتتحصل علي وظيفة وتخش للقطيع الي يبي يدير حوش وسيارة ويزوج وبعد الزواج تزيد تشقي بعائلتك ، المرحلة حتكون بطيئة وحتحس بيها سريعة يوم توصل 50 سنة وحتلاقي صديقك الي كنتو تحضرو في رسوم القناص جميع وتقولو أيييه سبحان الله كيف مشو الايام فيسع
وحيجيك يوم توصل لي قناعة أن علاقة الانسان بالأنسان ماتبنيها المدة ألي تقضوها مع بعضكم او صلة القرابة أو اللغة او اللون ، وحتكتشف أن العلاقة هذي تنبني مع كل أنسان بعدة أختلافات في ألي بسبب موقف وفي الي بسبب منفعة وفي الي بسبب علم ديني او دنيوي وفي بسبب صفاء النية وفي ألي بسبب الزهد ،وغيره وغيره وغيره الكثير ، وأن طول او قصر الزمن مش مقياس لصدقها وأنقاها العلاقات في الله
سبب الكلام هذا أن أكثر من واحد يتصل بيا ويلوم يقولي ماتتصل ومادور ، بس هذي سنة الحياة الأنسان قلة تواصله ماتعنيش أني فايتك وكثرة تواصلي معاك ماتعنيش انه مانيش ناسيك ، لاكن لازم الأنسان يقتنع أن هذي سنة الحياة تغير في ظروف الناس وألي بدورها تأثر علي سعي الانسان للتواصل مع غيره سواء قريب أو صديق ، التأثيرات هذي تكون بسبب أنشغال الأنسان مرات في بناء حياته او بأمور عائلية فما بالك من الناس ألي خربت الحرب كحرب أوباري حياتهم وقلبتها علي عقب و ترتيب هذي الحياة حيحتاج إلي السنين ( أني شخصيا من 5-10 هههههه ) يعني الأنسان هذا حيضطر مش لخفض نسبة التواصل مرات لقطعها باش يجاري العالم المتسارع الان تضطر مرات تخدم وتقرأ 15 ساعة في اليوم ، فا ألي مقصر معاه نقوله سامحني وهذا مايعني اني حنكثر من الأتصالات ولاكن حتجي فترة للأنسان متاع هدرزة وان شاء الله تكونو عايشين كلكم باش نهدرزو والي يعرفني مظبوط يعرف ان هدرزتي صوت وصورة وماتمش هههه
علعموم طولت لكن أطريت أني نشرح نظرية تطور الصداقة متاع داورن قصدي نينو هههه و كل عام وانت بخير ونسأل الله يتقبل منا ومنكم 😀

السبوع ألي فات في شاب كتب منشور وقال شن أسم وطموح كل من ضايفني فا أني كان عندي ملاحظة من قراءة التعليقات أن في نسبة لايستهان بيها من الناس هذي كتبو طموح سياسي واحد عميد بلدية واحد وزير واحد رئيس ليبيا , طبعا سبب الموضوع هذا بعض النقاط منها :

١- الوضع الليبي ووجود اكثر من ٣٠-٤٠ قناة كلهم يتكلمو عن السياسة والوضع المزري وبعض الناس ألي متصدرين الشاشة كانو روبيضة بس الوقت خلاهم يحلو ويربطو فا بسبب نجاح الرجل الفاشل او التافه هذا والمفلس قبل الي اصبح توا يمشي بمصفحات وحرس وجاكات وسفريات وفلوس , تلقا معظم الشباب يبي يولي زيه ليش يبي يولي زيه لأنه هو الي متصدر المشهد والاعلام ومؤثر حاليا , تخايل في شخص ليبي دار أختراع وصار مليونير او مليادير وتصدر الاخبار الليبية حيكون لشباب طموح يولو زيه او احسن منه , الزوز وصلو للنجاح ولفلوس والشهرة لاكن واحد قدم شيء كويس للناس والبشرية وواحد منافق يتاجر بدم وقضايا ناس باش يوصل لي مبتغاه فا ننصحك دور واحد زي الاول مع انه قليل في بيئتنا الليبية او مايبوش يبانو علي الشاشة باش مايخطفهم السياسي ويخنب فلوسهم ويكمل مشروعه لان عنده الغاية تبرر الوسيلة

في مرحلة حيوصللها الأنسان ( ومش اي أنسان ) الأنسان ألي تحصل علي مفاهيم عميقة في الحياة مثلا لشن عايش ، وشن يبي يدير في المستقبل وغيره ، الناس ألي يوصلو للحظة هذي حيكون عندهم نوع من الهدوء والعزلة والتأمل والكثير الكثير من التفكير لحل بعض المشاكل ، الناس هذو مرات يلقو هدارز عادية عند الشعب بس هو بسبب فهمه العميق للحياة ينظر أن الهدرزة هذي تافهة يفوتها أو مايتفاعلش لأن مرات مايبيش يضيع وقته او تشبع من الهدارز التافهة وألي أعتبرها سبب في خسارة بعض السنين من عمره ويبعد حتا عن بعض الهدارز العائلية ألي ينظرلها تضييع للوقت وحتوصل بيه لدرجة أن ناسه وخوته وغيرهم ومرات أصحابه المقربين وخاصة أذا غاب عليهم فترة وتلاقو معاه حيحسوه تغير أو نفسيته سائت وعادة الشيء هذا يكون ظاهر عليه مايسبب أن بعض الناس ينظروله بنظرة تكبر أو المتغطرس أو يشخصو حالته بالخلل او التعب النفسي ، بينما هو وصل لمرحلة من المفاهيم تصعب أو تطول عليهم مدة فهمها ، في بعض الناس توا يقرو في المنشور وصلو للمرحلة هذي لأني ألتقيت بالبعض منهم ، مش عارف هل سبب التحول هذا في ليه أجابة علمية عند علماء النفس او لا ، لكن اني نقول أن الألم من الأسباب ، نفس الشخص ألي وصل لمرحلة من الفهم العميق لدرجة نطق مقولة تألمت فتعلمت فتغيرت ، الألم هو ألي يخليه يتأمل ويفكر ويتعمق ويحلل ويكتشف ويعمل ، الألم هو ألي خلا ديستويفسكي وتولستوي وفيكتور هوغو وستيف جوبز في التقنية وغيره الكثير الكثير ألي كان عندهم كاريزما أذهلت العالم وطبعا في واجدين تانيين بس البعض ماحازش علي شهرة عالمية بسبب عدم كتابته للكتب أو عرضه لنظرية او طريقة يحل فيها مشكلة وعبر عن ألمه وفهمه للحياة فيها ، في ألي تألم من الفقر في ألي تألم من الظلم ، لكن أكثر الناس المخضرمين ألي يتميزو بصفات هذي يخرجو من دول مرت بالحروب لأن مافيش اصعب من ألم الحرب لأنه يجمع بين الألم ومرات الفقر ومرات التهجير ومرات الظلم ومرات القهر وغيره وغيره الكثير ، العراق وأفغانستان وسوريا وليبيا في المستقبل حيكون عندهم ناس زي هكي ونتوقع العراق وسوريا هما يتفوقو 🙂

التاريخ يعيد نفسه ولا يلقن أحد العبر

مشكلتنا الكبرى مش في الضيء مشكلتنا في أن الناس ( وأني معاهم 😀 ) تلذغ من الجحر مرتين ، يعني بعد حرب 2011 الضي قص علي معظم ليبيا ونقصت البنزينة والسيولة علي معظم ليبيا ، الناس ماتفكرت كيف الشيء هذا صار وهل من الممكن يتكرر باه كان تكرر كيف نحاول أنه في الجايات مانكونش ضحية ، التفكر والاسئلة هذي هيا الي تخلق حلول في البعض من الناس أكتشف حلول لاكن بعد أستقر الضي صارله خمول من جديد وبعد 2014 رجع طاح في الفخ والمصايب من الجديد
قيمة الأموال الي انضخت في فترة 2012-2013 معظم الناس وظفو هدي الاموال في طريقة غير مستدامة ( واني واحد منهم 😀 ) وظفو الاموال او صرفوهم وماحسبوش انهم في دولة مافيهاش استقرار امني وسياسي ونسبة تكرار تدهور الأوضاع زي نسبة ظهور الشمس علي ليبيا كل يوم فا أني شخصيا حسب نظرتي للوضع وصلت أن أحسن نمط حياة يعيش بيه الواحد في الحرب نمط الأستقلال المعيشي والفكري والمادي ونعطيكم مثال :
1- بدال لاتقعد معتمد علي ضيء الدولة شغل حوشك بالطاقة الشمسية وألي تكلفة تشغيلها لي حوش كامل مرفق بي بئر مية توصل لي 20 ألف ، ليش طاقة شمسية أحسن حل لأنك كان بتخدم بمولد وبدات لما تكون في الجنوب لفلوس الي بتدفعهم في النافطة لما يحسبوهالك البتية ب200 في سنة تدفع تكلفة طاقة شمسية والمولد مش مستدام يبي صيانة واواوا
2- بما أنك درت طاقة شمسية أنسي البنزينة ومشاكلها ودير سيارة كهربائية وفي بعض السيارات تمشي لي 80 كيلو بعد شحنها ( يعني تكمل مشاويرك بالكامل ) وتكلفتها 10 الاف وضررها اقل علي البيئة كانك من جماعة متطوع من أجل ليبيا الحرة وكان أدير صحن انترنت فضائي تحل مشكلة النت وتحل مشكلة الاتصالات بكروت icall her ألي يسمحولك تتصل بالهواتف الثابتة والنقالة
3- الأستقلال المادي وهو أنك لازم تتعلم أنك متحطش فلوسك في المصرف بدات في وضع زي هكي وكان تحصل تقدم أستقالتك من الدولة وتوكل علي الله دور عمل في القطاع الخاص ألي يعطيك مرتبك في يدك أو توكل علي الله كان عندك فلوس وأفتح مشروع ( طبعا فتح مشروع في حالة الحرب عنده نظرية ونمط 😀 لازم تتبعها حتا هيا ) الشيء هدا يعطيك الحرية المالية ان ماتحكمش فيك الدولةوتشد عليك رزقك ومالك وفي نفس الوقت الأستقلال المالي مايتم إلا بوجود التدبير الجيد في المعيشة وحتا هدي عندها نمط بروحه
4- اهم نقطة في الكلام هذا ، الأستقلال الفكري تعرف كان ماتوصل لي مرحلة يكون عندك أستقلال فكري وملكية الفكر التحليلي النقدي للأحداث وقرائتك وتحليلك تكون مبنية بجميع أنماط الحياة كحكم الدين وتحليلك الاجتماعي والسياسي والاقتصادي ماتقدرش تطلع خارج السرب ألي ماشي للهاوية ، الشخص ألي مايمتلكش الشيء هذا حيعيش لي تم الحرب مش معروف امتا مرات زي العراق 13 سنة ومرات أكثر حتعيش سنة يضخولك سيولة وتحس ان الوضع تحسن وتتريح وبعد اتم الحكومة تمشي سنتين ثلاثة مترمد في جرة الصراع السياسي

مرة نحكي مع واحد ، علي موضوع العبرة من الحرب الي صارت في ليبيا وأنها أكبر الدروس ألي تحدث في الأنسانية ألي ألي من المفترض ان يتعلم منها الواحد ، والشخص ألي ياخد العبرة والحكمة من هذا الدرس العظيم ألي فيه فصول من الأسي والحزن والقهر والشقاء والبلاء والفرحة وجميع الشعور البشري
فا جبتله مثال علي درس أن ماهي دايما لي حد وتوقع أي شيء وأبسط مثال قتله حفتر ألي أمس كان أسير في تشاد ودار الزمن بعد 25 سنة يولي الرئيس التشادي يستقبل حفتر كرئيس أركان
فلما بدينا في الهدرزة علي حفتر وموضوعه نبهته علي نقطة أن أي شخص يأثر علي مجموعة من الناس ويخلي الناس هدو يتبعو كلامه ومرات توصل لمرحلة أن يقدمو أرواحهم إيمانا بفكره ، هو شخص يستطيع ان يغير الواقع سواء للأفضل أو الأسوء حسب نيته ، وأبسط مثال تأثير حفتر من المنطقة الشرقية ، سواء سلبيا أو ايجابيا كلا حسب تفسيره
ولما ننظرو لي مجلة فوربس لما تحط في قائمة أكثر الشخصيات تأثيرا لعام معين ممكن نلقو فيهم شخصيات يعتبرو من أكبر مجرمي العالم ، وكأبسط مثال أبوبكر البغدادي رئيس تنظيم داعش الي كان في القائمة لعام 2015 مع الرئيس بوتين واوباما ومارك زوكربيرغ والسيسي وغيره ، يعني تستغرب كيف يحطو شخصية متهمة بأرتكاب أبشع الجرائم جهارا نهار ( طبعا حتا بعض الرؤساء الي في القائمة مرتكبين جرائم ) لكن لما تحلل الموضوع تلقا الشخص هذا أثر بفكره علي 17 الف سعودي يقاتل مع تنظيم الدولة و10 الاف تونسي ومايقارب 10 الاف من مختلف الجنسيات الاوروبية ، وماننسو الليبيين وفي الي يقولك هديم مخابرات ، اوكي مخابرات لكن بقيادة البغدادي ضحكو علي 3000 ليبي يقاتلو معاهم حسب التقديرات ، فا هو فعلا شخص مؤثر

لما تجي لعالمنا الأسلامي ألي داره سيدنا محمد يعتبر تأثير ، لكن البعض يقولي هذا نبي باه توا أني مانبيش نقوللكم أثرو علي مجتمعاتكم من الناحية الدينية او الشرعية ( طبعا الأمر بالمعروف والنهي عن المنكر واجب ) بس حنتكلم علي الأمور الدنيوية

لما تجي تقرأ قائمة 50 شخصية أثرت في البشرية ( من ناحية الدنيوية طبعا ) نلقو شخصيات متناقضة في تصرفاتها ، مثلا تلقا أدولف هتلر وتلقا مارثن لوثر كينغ ولا تلقا ستيف جوبز وتلقا ستالين ، السبب من هذا أن الناس هذيم غيرو فعل أو شيء في حياة البشر ، مثلا هتلر أحتل نص العالم ، بينما أبراهيم لينكون كان سبب عدم أنفصال أميركا ، والشيء هدا باش وصلوله أستخدمو طرق جيدة او سيئة غيرو بيها مسيرة البشر يعني هتلر باش مسك نص العالم قتل وشرد وخطف وحرق ودار حاجات أثرن الامور هدي علي الدكتور والمهندس والسباك والخباز والغفير وساعي البريد علي جميع مناحي الحياة في النص ألي أحتله ومرات تأثر النص التاني بسبب شح الموارد او نزوح الجماعات واواواوا

فا أنتا ألي تقرأ في المنشور ، ورينا تأثيرك في العالم وين يكون أطمح تأثر ومش شرط في العالم مرات تأثر في منطقتك ( مش دير كتيبة ولا تصكر طريق كيف المؤثرين ألي في ليبيا توا لالا 😀ماهكذا تورد الابل ) أثر في حوشكم في مدرستك في عملك أثر بي شيء يكون لك مذكر خير وطيبة وصلاح من بعدك شيء يذكرك به العبد فيدعو لك بالمغفرة والثواب لأن العبرة علمتنا أن الذي سبقونا نحن لاحقيهم أن شاء الله وقال سيدنا محمد صلي الله عليه وسلم ( ﻣﻦ ﺳﻦ ﻓﻲ ﺍﻹﺳﻼﻡ ﺳﻨﺔ ﺣﺴﻨﺔ ﻛﺎﻥ ﻟﻪ ﺃﺟﺮﻫﺎ ﻭﺃﺟﺮ ﻣﻦ ﻋﻤﻞ ﺑﻬﺎ ﻣﻦ ﺑﻌﺪﻩﻻ ﻳﻨﻘﺺ ﺫﻟﻚ ﻣﻦ ﺃﺟﻮﺭﻫﻢ ﺷﻴﺌﺎ، ﻭﻣﻦ ﺳﻦ ﻓﻲ ﺍﻹﺳﻼﻡ
ﺳﻨﺔ ﺳﻴﺌﺔ ﻛﺎﻥ ﻋﻠﻴﻪ ﻭﺯﺭﻫﺎ ﻭﻭﺯﺭ ﻣﻦ ﻋﻤﻞ ﺑﻬﺎ ﻣﻦ
ﺑﻌﺪﻩ ﻻ ﻳﻨﻘﺺ ﺫﻟﻚ ﻣﻦ ﺃﻭﺯﺍﺭﻫﻢ ﺷﻴﺌﺎ )
مرات تأثيرك يكون بأحياء سنة من سنن الشرع كيف مادار رجل الأعمال #السعودي #الراجحي لما دار أكبر وقف خير في العالم وألي هيا مزرعة تمور هذي سنة هجرها بعض التجار ورجال الأعمال ، ولازم لازم لازم أنتا كمسلم تأثيرك يكون مراعي وغير منافي لشريعتك الأسلامية يعني ماتقولي نبي نكون مؤثر زي بابلو أسكوبار نكون أكبر تاجر حشيش يساعد في القضاء علي الفقر
#فكر_وأسعي_وأثر_ومتنساش_تعتبر
والله أعلم
حبيب نينو

لما الليبيين يوصلو لي قناعة أن معاد في ناس فيها خير ، يبقا لازم الحد يصيرله موقف يقنعه أن مازال في ، والسبب ألي خلا الناس معاد يبو يساعدو حد هو أفرازات الحرب ألي خلت بعض الناس يتجردو من أنسانيتهم او فطرتهم أو تربيتهم أو أخلاقهم توصل لدرجة يفوت عليك مايسلم ، يشبحك عاطلة بيك السيارة مايقفلكش ، يقول مرات في فخ ولا كذا ولكن مع هذا أني ألقيت الموقف متاعي وتبعو معاي باش تعرفوه
أيام الدراسة في سبها في كلية الزراعة كنا ننزلو لي سبها ولما نكملو شغلنا في سبها ، نمشو لي مكان يقولوله محلات 24 يعرفوه ناس سبها واهل الجنوب كلهم ، كنا نقفو غادي نديرو في فخ 😀 لأصحاب السيارات ألي ماشيين لي أوباري ولا مرزق وضروري يدرسو علي اخر نقطة فيها محلات في سبها باش ياخد عوالة الطريق ولا شيء ناقصه ، وقبل 2011 كان أي شخص وفي اي ساعة يرفعنا معاه وهو طالع من سبها ويحطنا في الكلية الي تبعد علمكان هذاك 4 كيلو تقريبا ،لدرجة مرات نكونو طالعين من سبها ساعة واحد ولا أتنين الليل نوقفو غادي ومرات يقفلنا حد نركبو معاه 3 ولا اربعة انفار
طبعا بعد ثورة صبعطاش فبراير 😀 بعد الحروب القبلية متاع سبها والسرقة والقتل والخطف واواواوا ونسبة جريمة زي كولومبيا ، صادفني موقفين يخلنك تفقد الأمل في الناس وليبيا ، الموقف الاول صارلنا مع واحد 16*16 كان عنده تيوتا بقرة درس احدي المحلات قريب أذان العشاء وهو طالع قتله نبو قدام ياباشا ، قالي حدي المزارع ، قتله احنا نبو قبل المزارع كلية الزراعة ، وفوق من هكي شبحت احدي المارشة القيته حاط مطبقة روسية ، قالي كم واحد معاك 😀 قتله 3 قالي سامحوني بس دنيا مفيهاش امان توا ودار اولي وطلع
وتمضي الايام : يجي الموقف التاني ألي هو في نفس المكان ونفس التوقيت ، يجي شيباني عنده سوناتا رصاصية ، وطبعا اني ديما المتحدث الرسمي بأسم الطلبة ألي يشيرو في الطريق :d والمتفاوض مع اصحاب التاكسيات وغيره ، قدمت وقتله قدام ياحاج وهو قبل لايفتح حتا سيارته قالي وين تبو قتله كلية الزراعة قالي عندك سلاح ؟؟؟ قتله لا ، قالي تفكو مني السيارة قتله لا 😀 سكت شوي قال كان خليناكم في هاليل مشكلة ، يلا امري لله 😀 وركبنا وهو فاقد الأمل ويفكر كيف يطلب منا نخلوه يطلب اتصال واحد بأهله قبل لانقتلوه 😀 طبعا الشيباني وهو يسوق بقلق قعد يحكيلنا علي ولد خوه من الزيعن الي جاي يزوره في مستشفي 2 مارس الي طعنه واحد في رقبته بعد وقف لي زوز انفار بيقدمهم في طريقه لاكن طعنوه 7 طعنات وخنبو السيارة ، وقعد يحكيلنا ان الدنيا معاش فيها امان وتوا مرات توقف لحد بدير فيه خير تلقا روحك في كفن ولا مستشفي الحوادث ، بعد نزلنا قدام الكلية وتريح ان مافكينا منه السيارة ولا قتلناه 😀 قلت للجماعة الي معاي هذي اكبر مشكلة ان الناس تفقد الأمل في بعضها وتوصل لي قناعة أنه معاش في خير وماديره حتا انتا ، فا رد عليا واحد إلا نديرو سيارات الفصول الجاية 😀
وتمضي الأيام ونسبة الجريمة قاعدة نفسها والناس فاقدة الأمل ، لي يجي يوم من الأيام وللأمانة كان عشية الوقت وني موقف قي نفس لمكان ونسأل واحد عنده تيوتا بقرا قتله قدام ، قالي هيا تفضل كان شبوب قنين ركبت واحنا في الطريق قالي ماشي للمزارع وماسألني السؤالي المعتاد متاع منين أنتا وشن قبيلتك “باش يعرف الوضع بين قبيلته وقبيلتك ويعرف كان يعامل يحسبلك قدر ولا لا 😀 ” وقعد يسأل فيا علي أمور الدراسة ويهدرز لي سحب من كيس محطوط في الكراسي الخلفيات باكو حلويات وفتحه وقالي تفضل وقتله لا واصر وني ماعنديش نية لي قالي ضوق حتا طرف باش يولي بينا عيش وملح ” كلمة الطيبة صدقة ” حقيقة الفارس هذاك خلاني علي قد مافقدت الامل في الناس ألي تغيرت استعدت امل ان في ناس طيبة وحقيقة ماني متذكر يوم من الايام اني وقفت حد وقالي كلمة شفعت لي مواقف ياسرة درهت ومدرهة كبدي