في الحرب ألي صارت في ليبيا أضطر العديد من المقاتلين أنه يعيشو حياة بعيدة عن مستلزمات العناية الشخصية يعني بسبب أنه واحد قاعد في محور لمدة ٣ شهر او اكثر عادي تلقاه مش محلق شعره ومعفن وملابسه رديئة وهذا بسبب أنه في المحور يعني مافيش حمام مافيش حلاق مافيش مراية تشبح فيها كندرتك ماشية مرة الطرحة ولا لا ، وفيهم ألي داير جهده باش يعتني بنفسه من حلاقة للشعر والحفاظ علي القيافة وغيرها
لكن ألي تسببت بيه الحرب وأعتقد أنه مش حروب الجيوش ألي تسبب الشيء هذا بل أي مجموعات مسلحة من البشر غير منظمة والتي أطلق عليها في ليبيا الثوار ، تسببوا برسم صورة نمطية بعد نزولهم لطرابلس في الحرب التي وصفت بالتحرير بهذه المظاهر بأن هذه هيا مظاهر الرجال ( مشفشف ولابس كنتيرة وشبشب أصبع ولازم مايكونش شعره ناعم باش تظبط الشفشوفة )
المشكلة الكبري أنه المظهر أستمر حتى بعد أنتهاء الحرب يعني أصبحو يمشو لأحياشهم وعنده الحرية يحلق ويلبس كويس لاكن قاعد محافظ علي الصورة النمطية ألي خزنوها الناس في دماغاتهم في ٢٠١١ فا لما يفكرو يديروله أو يقولوله حاجة يتذكرو أنه الثائر المناضل المحارب ( نظرية أنه مخلي مظهره هكي باش مايفقد الصورة النمطية أمام الناس مش تفكير عميق منه لا لا التجارب متاع الحياة اليومية هيا ألي فهماته الشيء هذا وحس بالفرق بين قبل وتوا فا لازم يحافظ علي الشفشوفة أما أذا كان تفكيره عميق ماهوش قاعد حاله زي هكي )
كان في كابتن عسكري أسمه وليام سوينسون أستقبل يوم من الأيام نداء أستغاثة من فرقة مشكلة من الجيش الأفغاني والأمريكي أثر وقوعهم في كمين من ٣ محاور لطالبان قام وليام ورفاقه بأقتحام هذا الكمين وأنقاذ الجرحى وتم تكريمه علي ذلك وأيضا تم منحه وسام الشرف من الكونغرس الأمريكي وأكثر شيء سبب في شهرة وليام أنه بعد أنقاذ أحد أصدقائه وإيصاله لطائرة الأسعاف قبَله علي رأسه وعاد لينقذ الأخرين وهذي تدل علي عمق أرتباط القائد بجنوده
أني ألي لفت نظري أنهم كانو يصارعو في مجموعات وتشكيلات مخضرمة في الحرب لاكن مش محتاجين يديرو غفف أو يلبسو كنتيرات بل بالعكس كانو لابسين زي عسكري وألي لبسه بصفة عامة يعبر عن الانضباط وتعزيز الطاعة والتميز ويخلق نوعاً من الترابط، ويشيع روح المودة والزمالة والتضامن بين مرتديه في نفس الوقت وليام مش داير غفة بل بلعكس شعره ناعم وهذا الشيء ألي مش فاهمينه البعض ، الحرب في العصر هذا بالتقنيات ألي عندك وبالأسلحة وبالدعم المدرع البري والدعم الجوي وبهيبة الدولة ، راه أنتهت أيام هولاكو والمغول متاع طول شعرك وخليك معفن وكان تقتل حيوان بري وتلبس جلده يخافو منك ، وصح الناس تقيس بعينها لاكن عمرها ماكانت الشلفطة دليل علي الشجاعة وعمره ماكان حسن المنظر والهندام وخاصة للمقاتل يدل علي الضعف وأبسط مثال ألمانيا في الحرب العالمية التانية فا برا حلق ودير حمام وحسن هندامك
تقبيل رأس صديقه في الدقيقة الرابعة : http://bit.ly/2C1DGAD
سايمون سينك يتحدث عن القيادة وقصة وليام : http://bit.ly/2RAxtRR
منحه وسام الكونغرس : http://bit.ly/2zWPwuE
والله أعلم
حبيب نينو
