حسب تجربة سابقة ، وخاصة في مجالات تقديم الخدمات وبعض مجالات البيع ، الزبون في حالة مالقاش لافتة أو هوية تجارية مُعينة معروف بيها مُقدم الخدمة أو البائع ، تلقائيا حيعطي ولائه للشخص ألي يقدمله في الخدمة أو يبيعله ، وهذا من عيوبه أن الموظف هذا يوم يسيب محلك ، حيلحقوه الزبائن لأنهم تعودوا عليه وعطوه الولاء
لذلك شيء مهم في التجارة ، بعد تضمن العتبة دور أسم كويس ودير لافتة باش الزبون يعطي ولائه للأسم ألي فلافتة مش للشخص ألي في المحل ، خاصة في المحلات الصغار في حالة مش أنتا ألي بتمسكه
اللافتة أو الهوية التجارية من الأسباب ألي تساهم في ثبات ولاء الزبون ليك ، زد على ذلك جودة الخدمات والمعاملة والأسعار وغير ذلك
ملاحظة :
– من الأخطاء تسمي المحل بأسمك خاصة لو كان أسمك مستهلك زي عبدو وغيره
– تأثير الولاء على الزبون ورجوعه لمحلك يعتمد على نشاطات مُعينة وفي نشاطات مش مهم الولاء فيها ، مثلا جيت لمحل خضرة ولقيت البائع مش نفسه لا أعتقد أنه يهمك الموضوع عكس لما تكون ماشي لي فني صيانة نقالات
والله أعلم
حبيب نينو