عندي ملاحظة نبي نوضحها وهيا مهمة جدا
لاحظت ان معظم المشاريع ألي تطرح مشاريع كلاسيكية وموجودة ، ومعظمها مشاريع مبنية علي اصول ملموسة ، لاكن من المفترض الشيء ألي لازم يفهمه البعض أن احنا في دولة مافيهاش أستقرار أمني وسياسي وفيها عبث امني كبير صاير ، الناس الي تقود في الشيء هذا عندها أفكار ورؤية خاصة بيها ومايهمهاش في حالة استخدمو طرق غير أخلاقية تؤثر في حياة الناس وارزاقهم وبنية مناطقهم التحتية ، الشيء الي نبي نركز عليه ان الحرب الي صايرة سببت في خسارة ناس واجدة ، من ممتلكات شخصية ومن تجارة وصناعة وفي امثلة علي مستوي ليبيا من 2011 لي توا والخسائر بالمليارات
الشيء ألي نقدرو نساعدو بيه احنا كشباب ( رواد أعمال ) ، أن نتجهو ونركزو علي المشاريع المبنية علي بيئة افتراضية غير ملموسة ومشاريع تقنية سواء تطبيقات او مواقع ، الشيء هذا شن فوائده :
1- أنت كصاحب مشروع تكون مأمن علي مشروعك التقني ألي مثلا تقود فيه من ليبيا وسيرفره في أميركا ومبرمجينك في الهند ( طبعا عادي حتا مبرمجين ليبيين ) ، يعني لاسمح الله يصير شيء في منطقتك أهم شيء انجى براسك لأنك أنت عقل المشروع وأكبر رأس مال
2- سرعة التوسعة عكس الاشياء الملموسة ، في شركة فتحت المدة ألي فاتت متاع أعمال لوجستية أسمها الشاهين ، حقيقة فكرتهم جميلة ولكن سوء الأوضاع الامنية خلا الشركة ماتخدمش بكفاءة وأنعكس الشيء هذا علي رضاء الزبائن ، طبعا الشاهين كل مرة يفتحو توصيل لي منطقة ويوقفوه حسب اوضاع المنطقة الامنية زي لعزيزية والزهرة وغيره ، فالقيم المالية هادو الي تم خسارتهم في الشاهين مثلا لو هما كان أستثمارهم تقني ووظفو هذي الأموال في التسويق كان أكيد نجحو
3- زيادة دخول العملة الصعبة لسوق الليبية ، المشاريع التقنية عادة لما تتوسع مثلا لدول مجلس التعاون الخليجي يكون عندك دخل سواء كان من الأعلانات أو غيره الدخل هذا يكون بالعملة الصعبة ، يعني أدير مشروع دخله الشهري 5 الاف دولار القيمة هدي بعد تحولها بقيمتها الحالية شوف كم تطلع القيمة وشن تقدر أدير من قيمة اجتماعية ، ومرات ينجح مشروعك وتبيعه فمثلا في موقع طلبات الكويتي شراته قبل مدة شركة ألمانية ب170 مليون أي مايقارب بليبي بسعر السوق توا في حدود 550 مليون دينار ليبي ؟؟ !! فا تصور نسبة النجاح والربح
النظرية هذي أفضل وأقوي نظرية يقدرو يخدمو بيها الشباب في الوقت الحالي بدات في دول تشهدر عدم الأستقرار الأمني والسياسي
لتطبيق النظرية هذي يلزم في ليبيا منظمة أو منصة المنصة هذي تحط رؤية وأستراتيجية قصيرة المدى وسريعة علي أن مثلا بعد سنتين تحاول أن يكونو دربو 50 شركة ناشئة وتكون المنصة مشرفة علي الفعاليات الريادية وحلقات العصف الذهني وتقديم الأرشاد وعمل مسرعات نمو المشاريع وحاضنات أعمال وتوفير مساحات عمل مشتركة ، هكي لي حدود 2020 هكي أن شاء الله مرات نقدرو نقولو ان يكون عندنا شركات تقنية توصل لي قيمة طلبات أو اكثر
والله أعلم
حبيب نينو