التصنيف: الحياة

عادة في حياة الشعوب يطلع شخص يقول كلمة في خطاب أو في لحظة مهمة أو يكتب كتاب ويعرض فيه أفكاره ( الكلمة ) هذي ألي قالها أو كتبها في كتابه حتأثر في الناس وحيكرروها بحب أو كره أو سخرية مش شرط كلمة مرات نظرية هو قالها أو عمل بيها وحيلصقو الناس أسمه بهذي النظرية أو الفعل كمثال :
1- لما يقولك هذا أنسان ميكافيلي أو يخدم بنظرية ميكافيلية يعني نسبة لميكافيلي الإيطالي مؤلف كتاب الأمير ألي كتب فيه أساليب المحافظة علي الحكم وأهمها عنده الغاية تبرر الوسيلة
2- أورولية نسبة لجورج أوريل وألي خدو منه مصطلحات زي الحرب الباردة والأخ الكبير

 

المرة هذي بنتكلم علي أنه كيف أحنا كشباب نسعو لبناء قطاع خاص مستقل عن الدولة وكيف هذا القطاع الخاص يساعد علي نمو الأنتاج المحلي للدولة وتحسن المعيشة للفرد لكن يجي حد يقولك باهي أنتم مش أقتصاديين ولا خبراء أستراتيجيين تطلعو في القنوات لابسين قراويط باش نصدقوكم بس أني شخصيا كل مانشبح تجارب لي دول والبعض منها قريبة منا كدولة مصر وألي أني شخصيا نعتبرها عظيمة جدا بتجارب شبابها في كل المجالات وتشبح أنه ألي يديرو في تغير مش شرط يكون دكتور في مجاله بس عنده وعي

واحد من الشباب هذيم هو Ahmed Zahran وألي هو مؤسس مشارك والمدير التنفيذي لي شركة KarmSolar وألي أعلنت أمس في مؤتمرها الأول عن ٦ منتجات جديدة أطلقوها وهذا رايط الفيديو متاع المؤتمر : http://cutt.us/vVE5p صح ساعتين ونص لكن أفضل مؤتمر لشركة عربية نحضره ، توا أني هكي نفختها بكرم سولار وبتسألني تقولي شن دارو وأني نقولك حاجات بسيطة من أنجازاتهم
١- بناء محطة لشركة جهينة بطاقة 1 ميجاوات. تعد المحطة هي الأولى من نوعها فى مصر حيث ستساهم المحطة في توفير استهلاك نحو 600 ألف لتر من الديزل سنوياً وتفادى انبعاث نحو 1.62 ألف طن من ثاني اكسيد الكربون سنوياً.
٢- أسسو شركة كرم للبناء ألي تبني في مباني من مواد طبيعية كالأحجار وغيره وتستخدم الطاقة الشمسية وبنو ٥٠٠ منزل صحي بهذي الطريقة لوحدة من المزارع الكبيرة وحاليا حيبنو مقر شركتهم بنفس الطريقة ودارو شراكة مع عزة فهمي بيبنو في المستقبل مدن بي مواد طبيعية وبتصميمات تعكس الثقافة المصرية وهذا الفيديو http://cutt.us/1sDH3
٣ – أول شركة مصرية تبيع الكهرباء للحكومة
٤ – أول شركة مصرية تستخرج مياه الأبار للغاطسات ذات قدرة ٦٠٠ وفي أكثر من ٢٠ كيلو واط بالطاقة الشمسية بدون بطاريات وعندهم براءة أختراع عالمية بهذي التقنية
٥- طورو أول جهاز ليهم يتحكم في أدارة الطاقة وفيه أفكار عظيمة وهذا فيديو الجهازhttp://cutt.us/622J9 الجهاز مطور كله في مصر الصنع بس في ألمانيا بسبب المواد بس عن قريب في مصر
٦- من أول الشركات ألي تؤمن وتروج لثقافة الهجرة العكسية في مصر وأستغلال مساحات مصر الكبيرة وبدو بنفسهم بالأستثمار في المناطق الصحراوية الزراعية وحتا مقر شركتهم الجديد حيكون خارج العاصمة في المناطق الصحراوية وهذا فيديو المقر http://cutt.us/n5gfZ
٧- أول شركة مصرية بتبيع أجهزة الطاقة الشمسية بالتقسيط

هذا خاطي الشراكات مع منتجعات سهلة حشيش لبناء محطة وغيره من العديد مم الأنجازات ألي مايدسهم منشور واحد

السؤال : أحنا كيف نستفادو من هذا كله ؟

طبعا أحنا مافيش فرق بينا وبين مصر في معظم التضاريس حتا في توفر المياه والأرض الزراعية ، وألي من المفترض توا يندار لازم يتم الترويج للزراعة بطاقة الشمسية يعني كرم سولار عندها أجهزة يشغلو دوائر زراعية بالطاقة الشمسية وفي الجنوب مثلا عندنا مايقارب ١٤٠٠ دائرة زراعية و٧٠٪ منهم واقفات توا بسبب الكهرباء وفشل الأستعانة بالمولدات يعني من المفترض نزرعو بالطاقة الشمسية ورجال الاعمال يجيبو مصانع مصغرة حتا متاع انتاج ١٠٠ طن في اليوم يديروهم مثلا في الجنوب ولا في الشمال ويشغلوهم بالطاقة الشمسية تبقي تزرع بالطاقة الشمسية وتحول في المنتج الزراعي لي منتج تجاري بالمصانع ألي يخدمو بالطاقة الشمسية وتبيع سواء تكتفي بالسوق المحلي أو تصدر للخارج وبالأمكان عمل مشاريع صوبات ضخمة وأحسن تجربة نستفادو منها في أسبانيا وتقدر تصدر بعدين

ومن الأفكار التانية أن المقسمات الجديدة ألي يديرو فيها بعض رجال الأعمال من المفترض يدير فيها أستثمار طويل الأمد ويتعاون مع كرم للبناء يديرو تصميم يناسب الطاقة الشمسية ويبيع الأحياش مجهزات بألواح طاقة أو يدير محطة طاقة شمسية صغيرة مع الأستثمار العقاري ويقعد أستثمار طويل الأمد ويقعدو السكان يخلصو في أستهلاكهم شهريا
وهما أصلا من المفترض يطلعو برا المدن ويبنو مدن جديدة بطرق مستدامة وحتطلع حسبتها أقل ، وفي ربح مستدام في الخدمات متاع المدن

ومن المفترض العودة لأستخدام المواد الطبيعية والرخيصة زي الطين أو الحجارة مع تكييفها مع الظروف وتكون بمواصفات صحية جيدة وحتطلع أرخص من الأسمنت ألي يشرو فيه توا ب٣٣ وشوف مثلا زي المنزل ألي في الرابط هذا http://cutt.us/GUdJl كله بي مواد مستخرجة من الأرض وبتكلفة زهيدة وجميل المنزل بدون لياسة وزواق واواو ويعمل بالكامل بالطاقة الشمسية وصحي وتلقا شاب عمره قريب يوصل لل٣٥ يستنا الدولة تعطيه قرض ب ٦٠ الف ألي مايبنو حتا أستيديو توا وفي شباب قبل ساعيين في بناء منازل زي هكي من ضمنهم Raied Gheblawi وفي أيضا قصة جميلة لي مهندس مبدع من بوركينا فاسو قام ببناء مدارس لأبناء قريته بنفس الطريقة الرخيصة والمواد الطبيعية وهذا الفيديو : http://cutt.us/tRdoq

مجال الطاقة المتجددة فيه فرص كبيرة في المستقبل ويوفر في حلول ممتازة لتحسين حياة الناس أحنا في حالة ماصنعناش التقنية نحاولو علي الأقل نجيبوها ونوظفوها في الشيء ألي يقدملنا قيمة كبيرة علي الشباب يفكرو ويشوفو العالم شن يدير ويجيبو نفس الحلول بس يعدلوها بطريقة تمشي مع مناطقنا وثقافنا ، يجب التفكير والسعي في حلول الطاقة المستدامة والأقتصاد المعرفي لأنهم حيخلو حياة الناس أسهل وأفضل وهذا ألي داروه الشباب المصريين ونتمنى يجي دور شبابنا ولازم ولازم نعززو الشراكة مع القطاع الخاص ورجال الأعمال وننسو القطاع العام البيروقراطي

في حالة أنه وفرنا الماء بالطاقة الشمسية ووفرنا معاها الزراعة بالطاقة الشمسية ألي تعتبر كمصدر دخل للعديد من الأسر ووفرنا معاها الصناعة بالطاقة الشمسية ( صناعة بسيطة مش جو ألمانيا ) ووفرنا مساكن صحية بمواد طبيعية مستخرجة من أرضنا ورخيصة تكون هكي درت الشيء البسيط ألي داروه معظم الحضارات وألي هو بسطو طريقة نمو المجتمعات والمجتمع أو الحضارة لازم تختار موقعها بطريقة جيدة لأنك أنتا بتستقر أقل شيء فوق من ٥٠ سنة وباش تعرف طريقة أختيار المكان لازم تحضر كلمة أحمد زهران في تيدكس القاهرة

وهذا فيديو أحمد زهران في تيديكس القاهرة http://cutt.us/WVlcP
نبذة عن شركة كرم سولار http://cutt.us/KAlo2
قصة نجاح أحمد زهران http://cutt.us/drRKF

حبيب نينو

لما تكون ساكن في دولة مافيهاش أستقرار أمني وسياسي ومافيهاش قانون أفضل شخصية تعيش بيها هيا شخصية الهمجي النبيل 😀 مش همجي جو التتار والمغول ههههه لا لا ، لاكن همجي يعرف كيف يتصرف ويزاحم في زحمة المصرف لما يلقا 1000 نفر دايرين زحمة ويداعك في زحمة الخبزة ويفوت أشارة المرور وقت تحتاج الضرورة ويخش حتا عكسي ههه ومن المفضل يكون أنسان يعرف كيف يتصرف ويدافع عن نفسه ويستعمل العنف في الضرورة ويتحكم بغضبه وأذا كان يعرف يستخدم الاسلحة الشخصية زي الكلاشن والمسدس يكون أفضل لأن نسبة المختلين عقليا والمرضي النفسيين ألي مايقدر يعيش معاهم غير الهمجي النبيل كثرو ، ويكون نبيل مايسرقش ولا يؤذي الناس ولا يدخل في الفتن ولايقتل ويساعد المحتاج والضعيف ويعطف علي الصغير ويحترم الكبير
في ناس واجد عايشين بشخصية الهمجي النبيل لاكن مايعرفوش وفي من الناس محتار وديما يشكي لبلاد خربت كيف بنعيشو وأشتباكات وقانون مافي 😀 لاكن كان تعطيه نظرية الهمجي النبيل وتفهمه أنه في أكثر من همجي نبيل عايش في العراق من بداية الحرب لي توا ومافكر يطلع منها وماشية أموره 😀 ههههه يقتنع بعدين ويعيش براحة في دولة مافيهاش استقرار أمني وسياسي

والله أعلم
حبيب نينو 

في حياة الشعوب عادة في صراعات داخلية وخارجية والصراعات أنواع لاكن في صراع عادة بين القدامي والمحدثين الصراع مرات يكون بين مفكرين زي مفكري فرنسا في القرن السابع عشر او بين رواد أو رجال أعمال وكمثال الشباب الصغار الي دارو شركات نجحت بدون لايسمعو نصائح القدامى والي يتجسد في الصراع التقني ألي صاير توا وفي صراع سياسي او سلطوي زي صراع صدام حسين في صغره مع القوة الحاكمة وصراعة لينيين وستالين حتا هما وفي ليبيا المحدثين في الستينات كانو معمر والشباب ألي معاه ضد القدامي ألي هو الملك وألي معاه وسبب الصراع ديما خلاف الرأي يعني معمر كان ينظر للطريقة ألي تدار بيها لبلاد غلط وهذي سنة في فكر الشباب ديما يشبحو للشيابين انه افكارهم بالية أبسط مثال الموظف الجديد في الشركة لما يكون عنده رغبة يحدث الشركة ويلاقي المعادة من الموظفين القدامة خاصة الي ليهم 20 سنة او اكثر ، صح في من ناس كبار في العمر عندهم حكمة بس مايعني انهم يقدرو يجارو ألي صاير توا ، عادة المحدثين شباب أعمارهم من 15 لي 25 وكان زدت 30 أما ال35 وفوقهم هديم شيابين المفروض ميقولوش شباب هههههههه الشباب هذيم البيئة ألي كبرو فيها بنتلهم منظور وافكار و عدم انشغال معظمهم بمسؤليات الكبار خلاهم يشوفو حاجات الكبار ماشافوهنش او ماحسوش بيهم الشيء هدا يبني عندهم افكار يبو يطبقوهم او يسيرو عليهم فا يلقو مرات النقد او العراقيل من القدامى لانهم مش في نفس الفكر

في حاجة يمارسو فيها صناع القرار والسياسة في ليبيا وألي معظمهم يحركو فيهم من برا الشيء ألي يستعملو فيه ونومو بيه الشعب مغناطيسيا مالقيتش ليها تسمية أفضل من ألي قالها الناقد الأجتماعي جورج كارلين وألي أطلق علي الشيء هذا “اللغة الناعمة” وفعلا لغة ناعمة وماقدروش يوصلو للمرحلة هذي من التأثير علي الشعب بهذي اللغة لو لم يجدو فئة خطيرة جدا أخطر من السلاح ألي نسميهم أني المثقفين المرتزقة وفي شخص مبدع أسمه باسكال يونيفاس كتب عليهم كتاب وهو مفكر فرنسي والأكاديمي البارز ورئيس معهد العلاقات الدولية الأستراتيجية وسماه أسم المثقفون المزيفون ( كيف يصنع الأعلام خبراء في الكذب ) وأستحواذ فئة من الصحافيين والمعلقين والمثقفين من عديمي الضمير علي الفضاء الأعلامي والثقافي وقلبهم للحقائق بهدف توجيه الرأي العام حول قناعات أيديولوجية أحادية البعد وعلي رأس القائمة برنارد هنري ليفي وكان برنارد سبب في رفض ١٤ من دور النشر الكبرى طباعة ونشر هذا الكتاب وطبعا حنكتبلكم منشور خاص علي المثقفون المرتزقة المدة الجاية توا خلونا في اللغة الناعمة

جورج كارلين في الفيديو متاعه عطى مجموعة أمثلة من ضمنهم حالة عصبية يصاب بها المقاتل في الحرب والي هيا ارهاق الجهاز العصبي للمقاتل لي اقصي طاقته والي تسبب في توقف او انهيار الجهاز العصبي للمقاتل والي كان اسمها في الحرب العالمية الأولي كان اسم الحالة الصدمة العصبية وصف المصطلح هذا ببسيط وصادق وفي الحرب العالمية التانية نفس الحالة اسمها أعياء المعركة ونفس الحالة في الحرب الكورية عام ١٩٥٠ اسموها الأرهاق الأجرائي بعدين جت حرب فيتنام سميت نفس الحالة بأطراب مابعد الصدمة ووصف المطلح بالذي يدفن ألم المصالحة للحالة بالكامل
وحكي علي حاجات تانية زي المعلومات أصبحت المساعدة الأستشارية – صدام السيارات أصبح حوادث المركبات – غائم جزئيا أصبح مشمس جزئيا – السيارات المستعملة أصبحت وسائل النقل المملوكة سابقا – الفقراء يسكنون في مساكن غير صحية والأن أصبحت المساكن المشغولة المضرة أقتصاديا أسفل المعدل في المدن الداخلية – لأنهم فقراء ليش فقراء لأنهم طردو وألي تحولت توا لي الأدارة أرادت حصر الفائض في نطاق الموارد البشرية لذا كثير من الناس لم يعودو فعالين في القوة العاملة ههههه
وقال المرتزقة يوصفو بمقاتلو الحرية وعطى تسائل كان محاربو الجريمة يحابو في الجريمة ورجال الاطفاء يحاربو في النار محاربو الحرية في من يحاربو ؟

لاحظو كيف يتلاعبو باللغة ويعطو فينا مصطلحات مانعرفوهاش وناعمة لدرجة نحسو أنها تمثل لينا مسقبل أفضل او تمثل الواقع وكيف يقدرو يغيرو الحقائق وتفكير الناس بكلمات ابسط شيء في ليبيا المجموعة ألي دارت أنقلاب سموهم المجلس الأنتقالي – والحكومة ألي تم فرضها سموها حكومة التوافق الوطني – العصابة ألي متعاركة علي السلطة سموهم الفرقاء الليبيين – التسوية السياسية سموها المصالحة الوطنية – الأموال ألي مخضع بيها الغرب الشعب الليبي باش يجوع الشعب سموها الأموال المجمدة – الحرب الأهلية سموها مخاض الثورة أو الثورة تقتل أبنائها حتا في الضي الفشل والعجز أصبح أسمه طرح وتوزيع أحمال 😀 هههههه

وهذا مش حاصل في ليبيا بس بل حاصل ويحصل في العالم وهو علم كبير يستخدم في كل شيء وفي العديد من العلوم الغرض منه مرات تسويقي او نفسي او عسكري او طبي

ويتحكمو بالصفات ألي يطلقو فيها علي الأشخاص حسب رغبتهم وتطلعاتهم حفتر ألي كان أسمه أمس ثائر وكان في جبهة لبريقة أصبح أنقلابي وطاغوت وسام بن حميد ألي كان مع حقتر في الجبهة أطلقو عليه الأرهابي والداعشي وجضران ألي كان معاهم في الجبهة حتا هو أصبح السارق أو الأنفصالي

وهذا الشيء يستخدمو فيه كلهم أبدأ من داعش ألي يقول للأنتحاري أنغماسي ومشي للباقين ألي يوصفو بقتلة الطرف المعادي ليهم بمصطلح ناعم مايخليكش تنوض من غيبوبتك وهو مصطلح سقوط تحط علي قنوات الكرامة يقولك سقوط اتنان من قوات مجلس شوري بنغازي وتحط علي قنوات الفجر يقولك سقوط اتنان من مليشيات حفتر
كلمة السقوط ناعمة لدرجة ماتخليك توعى لأن الأطراف الزوز ليبيين وفي حالة الرغبة من زيادة مستوي الكره والحقد يستعملو مصطلح مقتل وفي حالة الرغبة في زرع الفتنة يستعمل مصطلع تصفية أو أغتيال وفي حالة الرغبة في رفع المعنويات يستعملو مصطلح أستشهاد وفي النهاية تعددت الأسباب والموت واحدة ولكن طريقة توصيل خبر الموت يتحكمو بيه حسب رغبتهم في ردة الفعل المطلوبة

المثقفين المرتزقة ألي يقدمو في المعلومات والمصطلحات وغيرها من هذي المواضيع للصحفيين والسياسيين والأبواق
ألي تطلع في التلفزيون موجودين في كل منطقة وفي كل قبيلة هما يعرفو كيف يستقطبو بعضهم هدفعم النهائي المال لأن معظمهم ميطلعوش علي الشاشة إلا القليل من محبي الشهرة , النوعية هذي أوسخ خلق الله حاليا في ليبيا يتلونو حسب الوقت والمطلوب والمال وهم من أسباب الوهم لي عايش فيه الشعب فا قلل من التلفزيون لأنك مقاد عن طريقه الأوصاف ألي توصف فيها للناس سواء بجرد ولا طحلوب او بودري او قهوي او غيرها هيا عبارة عن سم بثوه ليك عن طريق التلفزيون قلل من التلفزيون وأبتعد عن القنوات الليبية والأخبارية في حالة ماعندكش ملكية الفكر التحليل النقدي لأن اللغة الناعمة حتوجه تفكيرك

والله أعلم
حبيب نينو

الحياة ألي حيعيشها الأنسان علي وجه الارض إلى مماته حتكون طويلة بس سريعة وبطيئة في العلاقات الاجتماعية ، في مراحل بقاء الانسان علي وجه الارض وخاصة من عمر 8 إلي 20 حيبحث الانسان عن الصديق ألي يشاهد فيه في الرسوم المتحركة الصديق ألي تكونو انتم الزوز طول العمر كمثال أصدقاء كونان هههه او صداقة غون وكيلوا حتبحث عن الصديق هذا لدرجة أنك تفقد الأمل في وجوده والسبب في ذلك مايفهماش الطفل في صغره وفي ألي يكون في سن الرشد ومالاحظش السبب وألي هو أن الطفولة تنتهي في حياة الواقع أما في الرسوم المتحركة فلا ، كمثال رسوم كونان ليهم اكثر من 15 سنة وغون وكيلوا في القناص نفس الموضوع قاعدين اعمارهم 12-15 ، انتا وقت يكون عمرك 10 سنين تحضر في القناص يعجبك معني الصداقة الموجود يين غون وكيلوا وتقعد تبحث عن كيلوا متاعك او غون متاعك لاكن تتفاجاء ان مش موجود لي توصل لي 25 سنة مثلا تقتنع وتقول أن مافيش صديق زي هكي ( مرات تقولها بنبرة أولاد سليم اللبنانين – مافيش صاحب بيتصاحب 😀 ) والسبب من صناع الرسوم ألي اوهمو الاطفال ان في صديق يقدر يكون صديقك طول العمر وهما مخليين الشخصيات مايكبروش باش مايقفش ربحهم لان كان كبرو الشخصيات يجيهم يوم ويموتن الشخصيات هذي وهذا ماهوش دخل مستدام ليهم وفي نفس الوقت الشيء هذا ليه تأثير سلبي علي الاطفال ويقع علي عاتق صناع هذي الرسوم
من المفترض ان الطفل بعد يوصل لي سن الرشد لازم يكتشف ان مافيش صديق دائم او بمعني اصح مافيش صديق انت وياه تكونو مع بعضكم مدي الحياة انتا في النهاية حتكبر وانتا في النهاية انسان وحتسلك مسلك الانسان الطبيعي وانتا اصلا لما تكون طفل ماتتحكمش بقررات حياتك او معيشتك لانك فرد في اسرة والاسرة هذي مرات تنتقل او تسافر كلا حسب ظروفه او قرارات الاب وهذا من اول نقائض قاعدة الرسوم ، وبعد هكي انتا كل ماتكبر حتتغير عليك المدرسة والاصدقاء في الي يبهرك وفي الي تبهره وبعد تخش للثانوية يزيد يتغير تفكيرك ومن التانوية تكتشف ان في حاجة اسمها خبث ومصلحة ومرات حسد تتزيد تتسع الفجوة وبعدها الكلية ضغط دراسة وزيادة الالتزامات العائلية بسبب سن الرشد وبعدها تتخرج وتتحصل علي وظيفة وتخش للقطيع الي يبي يدير حوش وسيارة ويزوج وبعد الزواج تزيد تشقي بعائلتك ، المرحلة حتكون بطيئة وحتحس بيها سريعة يوم توصل 50 سنة وحتلاقي صديقك الي كنتو تحضرو في رسوم القناص جميع وتقولو أيييه سبحان الله كيف مشو الايام فيسع
وحيجيك يوم توصل لي قناعة أن علاقة الانسان بالأنسان ماتبنيها المدة ألي تقضوها مع بعضكم او صلة القرابة أو اللغة او اللون ، وحتكتشف أن العلاقة هذي تنبني مع كل أنسان بعدة أختلافات في ألي بسبب موقف وفي الي بسبب منفعة وفي الي بسبب علم ديني او دنيوي وفي بسبب صفاء النية وفي ألي بسبب الزهد ،وغيره وغيره وغيره الكثير ، وأن طول او قصر الزمن مش مقياس لصدقها وأنقاها العلاقات في الله
سبب الكلام هذا أن أكثر من واحد يتصل بيا ويلوم يقولي ماتتصل ومادور ، بس هذي سنة الحياة الأنسان قلة تواصله ماتعنيش أني فايتك وكثرة تواصلي معاك ماتعنيش انه مانيش ناسيك ، لاكن لازم الأنسان يقتنع أن هذي سنة الحياة تغير في ظروف الناس وألي بدورها تأثر علي سعي الانسان للتواصل مع غيره سواء قريب أو صديق ، التأثيرات هذي تكون بسبب أنشغال الأنسان مرات في بناء حياته او بأمور عائلية فما بالك من الناس ألي خربت الحرب كحرب أوباري حياتهم وقلبتها علي عقب و ترتيب هذي الحياة حيحتاج إلي السنين ( أني شخصيا من 5-10 هههههه ) يعني الأنسان هذا حيضطر مش لخفض نسبة التواصل مرات لقطعها باش يجاري العالم المتسارع الان تضطر مرات تخدم وتقرأ 15 ساعة في اليوم ، فا ألي مقصر معاه نقوله سامحني وهذا مايعني اني حنكثر من الأتصالات ولاكن حتجي فترة للأنسان متاع هدرزة وان شاء الله تكونو عايشين كلكم باش نهدرزو والي يعرفني مظبوط يعرف ان هدرزتي صوت وصورة وماتمش هههه
علعموم طولت لكن أطريت أني نشرح نظرية تطور الصداقة متاع داورن قصدي نينو هههه و كل عام وانت بخير ونسأل الله يتقبل منا ومنكم 😀

السبوع ألي فات في شاب كتب منشور وقال شن أسم وطموح كل من ضايفني فا أني كان عندي ملاحظة من قراءة التعليقات أن في نسبة لايستهان بيها من الناس هذي كتبو طموح سياسي واحد عميد بلدية واحد وزير واحد رئيس ليبيا , طبعا سبب الموضوع هذا بعض النقاط منها :

١- الوضع الليبي ووجود اكثر من ٣٠-٤٠ قناة كلهم يتكلمو عن السياسة والوضع المزري وبعض الناس ألي متصدرين الشاشة كانو روبيضة بس الوقت خلاهم يحلو ويربطو فا بسبب نجاح الرجل الفاشل او التافه هذا والمفلس قبل الي اصبح توا يمشي بمصفحات وحرس وجاكات وسفريات وفلوس , تلقا معظم الشباب يبي يولي زيه ليش يبي يولي زيه لأنه هو الي متصدر المشهد والاعلام ومؤثر حاليا , تخايل في شخص ليبي دار أختراع وصار مليونير او مليادير وتصدر الاخبار الليبية حيكون لشباب طموح يولو زيه او احسن منه , الزوز وصلو للنجاح ولفلوس والشهرة لاكن واحد قدم شيء كويس للناس والبشرية وواحد منافق يتاجر بدم وقضايا ناس باش يوصل لي مبتغاه فا ننصحك دور واحد زي الاول مع انه قليل في بيئتنا الليبية او مايبوش يبانو علي الشاشة باش مايخطفهم السياسي ويخنب فلوسهم ويكمل مشروعه لان عنده الغاية تبرر الوسيلة

في مرحلة حيوصللها الأنسان ( ومش اي أنسان ) الأنسان ألي تحصل علي مفاهيم عميقة في الحياة مثلا لشن عايش ، وشن يبي يدير في المستقبل وغيره ، الناس ألي يوصلو للحظة هذي حيكون عندهم نوع من الهدوء والعزلة والتأمل والكثير الكثير من التفكير لحل بعض المشاكل ، الناس هذو مرات يلقو هدارز عادية عند الشعب بس هو بسبب فهمه العميق للحياة ينظر أن الهدرزة هذي تافهة يفوتها أو مايتفاعلش لأن مرات مايبيش يضيع وقته او تشبع من الهدارز التافهة وألي أعتبرها سبب في خسارة بعض السنين من عمره ويبعد حتا عن بعض الهدارز العائلية ألي ينظرلها تضييع للوقت وحتوصل بيه لدرجة أن ناسه وخوته وغيرهم ومرات أصحابه المقربين وخاصة أذا غاب عليهم فترة وتلاقو معاه حيحسوه تغير أو نفسيته سائت وعادة الشيء هذا يكون ظاهر عليه مايسبب أن بعض الناس ينظروله بنظرة تكبر أو المتغطرس أو يشخصو حالته بالخلل او التعب النفسي ، بينما هو وصل لمرحلة من المفاهيم تصعب أو تطول عليهم مدة فهمها ، في بعض الناس توا يقرو في المنشور وصلو للمرحلة هذي لأني ألتقيت بالبعض منهم ، مش عارف هل سبب التحول هذا في ليه أجابة علمية عند علماء النفس او لا ، لكن اني نقول أن الألم من الأسباب ، نفس الشخص ألي وصل لمرحلة من الفهم العميق لدرجة نطق مقولة تألمت فتعلمت فتغيرت ، الألم هو ألي يخليه يتأمل ويفكر ويتعمق ويحلل ويكتشف ويعمل ، الألم هو ألي خلا ديستويفسكي وتولستوي وفيكتور هوغو وستيف جوبز في التقنية وغيره الكثير الكثير ألي كان عندهم كاريزما أذهلت العالم وطبعا في واجدين تانيين بس البعض ماحازش علي شهرة عالمية بسبب عدم كتابته للكتب أو عرضه لنظرية او طريقة يحل فيها مشكلة وعبر عن ألمه وفهمه للحياة فيها ، في ألي تألم من الفقر في ألي تألم من الظلم ، لكن أكثر الناس المخضرمين ألي يتميزو بصفات هذي يخرجو من دول مرت بالحروب لأن مافيش اصعب من ألم الحرب لأنه يجمع بين الألم ومرات الفقر ومرات التهجير ومرات الظلم ومرات القهر وغيره وغيره الكثير ، العراق وأفغانستان وسوريا وليبيا في المستقبل حيكون عندهم ناس زي هكي ونتوقع العراق وسوريا هما يتفوقو 🙂

التاريخ يعيد نفسه ولا يلقن أحد العبر

مشكلتنا الكبرى مش في الضيء مشكلتنا في أن الناس ( وأني معاهم 😀 ) تلذغ من الجحر مرتين ، يعني بعد حرب 2011 الضي قص علي معظم ليبيا ونقصت البنزينة والسيولة علي معظم ليبيا ، الناس ماتفكرت كيف الشيء هذا صار وهل من الممكن يتكرر باه كان تكرر كيف نحاول أنه في الجايات مانكونش ضحية ، التفكر والاسئلة هذي هيا الي تخلق حلول في البعض من الناس أكتشف حلول لاكن بعد أستقر الضي صارله خمول من جديد وبعد 2014 رجع طاح في الفخ والمصايب من الجديد
قيمة الأموال الي انضخت في فترة 2012-2013 معظم الناس وظفو هدي الاموال في طريقة غير مستدامة ( واني واحد منهم 😀 ) وظفو الاموال او صرفوهم وماحسبوش انهم في دولة مافيهاش استقرار امني وسياسي ونسبة تكرار تدهور الأوضاع زي نسبة ظهور الشمس علي ليبيا كل يوم فا أني شخصيا حسب نظرتي للوضع وصلت أن أحسن نمط حياة يعيش بيه الواحد في الحرب نمط الأستقلال المعيشي والفكري والمادي ونعطيكم مثال :
1- بدال لاتقعد معتمد علي ضيء الدولة شغل حوشك بالطاقة الشمسية وألي تكلفة تشغيلها لي حوش كامل مرفق بي بئر مية توصل لي 20 ألف ، ليش طاقة شمسية أحسن حل لأنك كان بتخدم بمولد وبدات لما تكون في الجنوب لفلوس الي بتدفعهم في النافطة لما يحسبوهالك البتية ب200 في سنة تدفع تكلفة طاقة شمسية والمولد مش مستدام يبي صيانة واواوا
2- بما أنك درت طاقة شمسية أنسي البنزينة ومشاكلها ودير سيارة كهربائية وفي بعض السيارات تمشي لي 80 كيلو بعد شحنها ( يعني تكمل مشاويرك بالكامل ) وتكلفتها 10 الاف وضررها اقل علي البيئة كانك من جماعة متطوع من أجل ليبيا الحرة وكان أدير صحن انترنت فضائي تحل مشكلة النت وتحل مشكلة الاتصالات بكروت icall her ألي يسمحولك تتصل بالهواتف الثابتة والنقالة
3- الأستقلال المادي وهو أنك لازم تتعلم أنك متحطش فلوسك في المصرف بدات في وضع زي هكي وكان تحصل تقدم أستقالتك من الدولة وتوكل علي الله دور عمل في القطاع الخاص ألي يعطيك مرتبك في يدك أو توكل علي الله كان عندك فلوس وأفتح مشروع ( طبعا فتح مشروع في حالة الحرب عنده نظرية ونمط 😀 لازم تتبعها حتا هيا ) الشيء هدا يعطيك الحرية المالية ان ماتحكمش فيك الدولةوتشد عليك رزقك ومالك وفي نفس الوقت الأستقلال المالي مايتم إلا بوجود التدبير الجيد في المعيشة وحتا هدي عندها نمط بروحه
4- اهم نقطة في الكلام هذا ، الأستقلال الفكري تعرف كان ماتوصل لي مرحلة يكون عندك أستقلال فكري وملكية الفكر التحليلي النقدي للأحداث وقرائتك وتحليلك تكون مبنية بجميع أنماط الحياة كحكم الدين وتحليلك الاجتماعي والسياسي والاقتصادي ماتقدرش تطلع خارج السرب ألي ماشي للهاوية ، الشخص ألي مايمتلكش الشيء هذا حيعيش لي تم الحرب مش معروف امتا مرات زي العراق 13 سنة ومرات أكثر حتعيش سنة يضخولك سيولة وتحس ان الوضع تحسن وتتريح وبعد اتم الحكومة تمشي سنتين ثلاثة مترمد في جرة الصراع السياسي

مرة نحكي مع واحد ، علي موضوع العبرة من الحرب الي صارت في ليبيا وأنها أكبر الدروس ألي تحدث في الأنسانية ألي ألي من المفترض ان يتعلم منها الواحد ، والشخص ألي ياخد العبرة والحكمة من هذا الدرس العظيم ألي فيه فصول من الأسي والحزن والقهر والشقاء والبلاء والفرحة وجميع الشعور البشري
فا جبتله مثال علي درس أن ماهي دايما لي حد وتوقع أي شيء وأبسط مثال قتله حفتر ألي أمس كان أسير في تشاد ودار الزمن بعد 25 سنة يولي الرئيس التشادي يستقبل حفتر كرئيس أركان
فلما بدينا في الهدرزة علي حفتر وموضوعه نبهته علي نقطة أن أي شخص يأثر علي مجموعة من الناس ويخلي الناس هدو يتبعو كلامه ومرات توصل لمرحلة أن يقدمو أرواحهم إيمانا بفكره ، هو شخص يستطيع ان يغير الواقع سواء للأفضل أو الأسوء حسب نيته ، وأبسط مثال تأثير حفتر من المنطقة الشرقية ، سواء سلبيا أو ايجابيا كلا حسب تفسيره
ولما ننظرو لي مجلة فوربس لما تحط في قائمة أكثر الشخصيات تأثيرا لعام معين ممكن نلقو فيهم شخصيات يعتبرو من أكبر مجرمي العالم ، وكأبسط مثال أبوبكر البغدادي رئيس تنظيم داعش الي كان في القائمة لعام 2015 مع الرئيس بوتين واوباما ومارك زوكربيرغ والسيسي وغيره ، يعني تستغرب كيف يحطو شخصية متهمة بأرتكاب أبشع الجرائم جهارا نهار ( طبعا حتا بعض الرؤساء الي في القائمة مرتكبين جرائم ) لكن لما تحلل الموضوع تلقا الشخص هذا أثر بفكره علي 17 الف سعودي يقاتل مع تنظيم الدولة و10 الاف تونسي ومايقارب 10 الاف من مختلف الجنسيات الاوروبية ، وماننسو الليبيين وفي الي يقولك هديم مخابرات ، اوكي مخابرات لكن بقيادة البغدادي ضحكو علي 3000 ليبي يقاتلو معاهم حسب التقديرات ، فا هو فعلا شخص مؤثر

لما تجي لعالمنا الأسلامي ألي داره سيدنا محمد يعتبر تأثير ، لكن البعض يقولي هذا نبي باه توا أني مانبيش نقوللكم أثرو علي مجتمعاتكم من الناحية الدينية او الشرعية ( طبعا الأمر بالمعروف والنهي عن المنكر واجب ) بس حنتكلم علي الأمور الدنيوية

لما تجي تقرأ قائمة 50 شخصية أثرت في البشرية ( من ناحية الدنيوية طبعا ) نلقو شخصيات متناقضة في تصرفاتها ، مثلا تلقا أدولف هتلر وتلقا مارثن لوثر كينغ ولا تلقا ستيف جوبز وتلقا ستالين ، السبب من هذا أن الناس هذيم غيرو فعل أو شيء في حياة البشر ، مثلا هتلر أحتل نص العالم ، بينما أبراهيم لينكون كان سبب عدم أنفصال أميركا ، والشيء هدا باش وصلوله أستخدمو طرق جيدة او سيئة غيرو بيها مسيرة البشر يعني هتلر باش مسك نص العالم قتل وشرد وخطف وحرق ودار حاجات أثرن الامور هدي علي الدكتور والمهندس والسباك والخباز والغفير وساعي البريد علي جميع مناحي الحياة في النص ألي أحتله ومرات تأثر النص التاني بسبب شح الموارد او نزوح الجماعات واواواوا

فا أنتا ألي تقرأ في المنشور ، ورينا تأثيرك في العالم وين يكون أطمح تأثر ومش شرط في العالم مرات تأثر في منطقتك ( مش دير كتيبة ولا تصكر طريق كيف المؤثرين ألي في ليبيا توا لالا 😀ماهكذا تورد الابل ) أثر في حوشكم في مدرستك في عملك أثر بي شيء يكون لك مذكر خير وطيبة وصلاح من بعدك شيء يذكرك به العبد فيدعو لك بالمغفرة والثواب لأن العبرة علمتنا أن الذي سبقونا نحن لاحقيهم أن شاء الله وقال سيدنا محمد صلي الله عليه وسلم ( ﻣﻦ ﺳﻦ ﻓﻲ ﺍﻹﺳﻼﻡ ﺳﻨﺔ ﺣﺴﻨﺔ ﻛﺎﻥ ﻟﻪ ﺃﺟﺮﻫﺎ ﻭﺃﺟﺮ ﻣﻦ ﻋﻤﻞ ﺑﻬﺎ ﻣﻦ ﺑﻌﺪﻩﻻ ﻳﻨﻘﺺ ﺫﻟﻚ ﻣﻦ ﺃﺟﻮﺭﻫﻢ ﺷﻴﺌﺎ، ﻭﻣﻦ ﺳﻦ ﻓﻲ ﺍﻹﺳﻼﻡ
ﺳﻨﺔ ﺳﻴﺌﺔ ﻛﺎﻥ ﻋﻠﻴﻪ ﻭﺯﺭﻫﺎ ﻭﻭﺯﺭ ﻣﻦ ﻋﻤﻞ ﺑﻬﺎ ﻣﻦ
ﺑﻌﺪﻩ ﻻ ﻳﻨﻘﺺ ﺫﻟﻚ ﻣﻦ ﺃﻭﺯﺍﺭﻫﻢ ﺷﻴﺌﺎ )
مرات تأثيرك يكون بأحياء سنة من سنن الشرع كيف مادار رجل الأعمال #السعودي #الراجحي لما دار أكبر وقف خير في العالم وألي هيا مزرعة تمور هذي سنة هجرها بعض التجار ورجال الأعمال ، ولازم لازم لازم أنتا كمسلم تأثيرك يكون مراعي وغير منافي لشريعتك الأسلامية يعني ماتقولي نبي نكون مؤثر زي بابلو أسكوبار نكون أكبر تاجر حشيش يساعد في القضاء علي الفقر
#فكر_وأسعي_وأثر_ومتنساش_تعتبر
والله أعلم
حبيب نينو