مخيم تدريب البرمجة الأول في ليبيا

المنشور ألي فات تكلمت فيه عن طريقة تعزيز المواطن الليبي البسيط بالتكنولوجيا وكيف أن الشيء هذا ممكن يرفع من جودة الحياة وكتبت أكثر من مرة علي ضرورة التحول الرقمي ، وقلت في النهاية أني حنكتب علي أهم عنصر لتطبيق العملية هذي ، ألي هو المبرمج

المبرمج أهم عنصر في عملية التحول الرقمي وتعزيز الحياة بالتكنولوجيا وأحنا في ليبيا نعانوا من عدم وجود مبرمجين وهذا مداير عائق كبير لصناعة منتجات تحل مشاكلنا ، ومن أكبر أسباب المشكلة هذي عدم ملائمة مخرجات المعاهد والكليات التقنية مع متطلبات السوق ، والشيء هذا يبي وزارة التعليم أدير قرار بتغيير المناهج بما يتناسب مع السوق

لاكن الحل الأسرع والأفضل مرونة ، أنه يندار مخيم تدريبي توا في العطلة الصيفية يدرب ١٠٠٠ طالب علي المجالات المطلوبة حاليا زي برمجة الويب وبرمجة تطبيقات الهواتف الذكية باش ينزلوا الشباب المتخرجين لسوق العمل ، في حالة أحترفوا ٥٠ شخص بس من الألف حيديروا مساهمة كبيرة في صناعة المنتجات ألي تحل مشاكل الناس زي النقل وغيره ، وعادي حتى أعتبروا المشروع نموذج مصغر من مبادرة مؤسسة دبي المستقبل لتدريب مليون مبرمج عربي ، وهما ماداروا المبادرة هذي ومادفعوا لفلوس والجوائز هذي إلا علما منهم بمدى تأثير وجود مبرمجين في أي مجتمع يساعدوا في حل المشاكل عن طريق التكنولوجيا

باهي من يدعم المشروع هذا ؟!
المفروض يتم دعمه من الشركات الكبرى خاصة شركات الأتصالات زي الليبيانا والمدار وحتى الشركات الخاصة الكبيرة زي النسيم ويكلفوا منظمات تكنولوجيا زي هكسا أو غيرها لأداراة وقيادة الموضوع هذا ، وفي المستقبل حيشبحوا حجم التأثير ألي حيديروه المبرمجين بعد يحلوا مشاكل المجتمع

حاليا في مجهود كبير ومشابه في بنغازي لعمل مواضيع زي هكي من شركة تطوير للأبحاث وكانت خطوة الحاضنة ألي داروها أيضا كويسة ، فا نتمنوا أنه يتم عمل المخيم في طرابلس في الصيف والتوسع لبنغازي والجنوب في المستقبل باش نسرعوا في عملية التحول الرقمي

والله أعلم
حبيب نينو