السبوع ألي فات في شاب كتب منشور وقال شن أسم وطموح كل من ضايفني فا أني كان عندي ملاحظة من قراءة التعليقات أن في نسبة لايستهان بيها من الناس هذي كتبو طموح سياسي واحد عميد بلدية واحد وزير واحد رئيس ليبيا , طبعا سبب الموضوع هذا بعض النقاط منها :
١- الوضع الليبي ووجود اكثر من ٣٠-٤٠ قناة كلهم يتكلمو عن السياسة والوضع المزري وبعض الناس ألي متصدرين الشاشة كانو روبيضة بس الوقت خلاهم يحلو ويربطو فا بسبب نجاح الرجل الفاشل او التافه هذا والمفلس قبل الي اصبح توا يمشي بمصفحات وحرس وجاكات وسفريات وفلوس , تلقا معظم الشباب يبي يولي زيه ليش يبي يولي زيه لأنه هو الي متصدر المشهد والاعلام ومؤثر حاليا , تخايل في شخص ليبي دار أختراع وصار مليونير او مليادير وتصدر الاخبار الليبية حيكون لشباب طموح يولو زيه او احسن منه , الزوز وصلو للنجاح ولفلوس والشهرة لاكن واحد قدم شيء كويس للناس والبشرية وواحد منافق يتاجر بدم وقضايا ناس باش يوصل لي مبتغاه فا ننصحك دور واحد زي الاول مع انه قليل في بيئتنا الليبية او مايبوش يبانو علي الشاشة باش مايخطفهم السياسي ويخنب فلوسهم ويكمل مشروعه لان عنده الغاية تبرر الوسيلة
٢- البعض يبي يولي سياسي او وزير او عميد بلدية لانه حاس انه يمتلك الحل وانه كان اعطي هذا المنصب يدير تغيير وهو ديما يكتب في الحلول في الفيس لاكن مافي حد يستمعله , فا يقول باش نطبق التغيير ألي فراصي لازم نرشح روحي واواوا , لاكن بعد يخش للمتاهة هذي ينصدم حيلقى نفسه مع عصابة خنابين واواواوواوا فا يكتشف انه فشل يدير اي حاجة وابسط مثال الناس الي مسكو الوزارات من ٢٠١١ لي توا في كان في اكثر من انسان نظيف وعنده افكار بس فشل بسبب العصابات هذي
٣- قلة وجود قدوة ليبية ناجحة وتكون بعيدة عن الدولة والسياسة هيا ألي خلت الناس المؤثرين في السياسة هما ألي أصبحو بديل للشخصية الناجحة والقدوة والمؤثرة في ليبيا
٤- البيئة المنزلية وألي هيا لاحظ معظم العائلات ألي عندها الوزراء والسفراء معظم طموح ابنائهم وافراد عائلاتهم سواء اولاد ولا بنات ان يبو يولو اعضاء نواب او سفراء او غيره , سبب هذا ان البيئة الي عاش فيها الولد خلاته يختزل النجاح والتقدير الاجتماعي في السياسة ناهيك عن تجهيز معظم العائلات الارستقراطية لابنائهم وتربيتهم لكي يخلفوهم في أفناء حياتهم في محاولة الفوز بالمناصب او قيادة القطعان البشرية , وفي اسماء طلعت ومتكررة تسمعها في اكثر من مكان فيالدولة بنفس الالقاب ومن نفس العائلات
وفي العديد من من الأسباب ألي مرات ميزال ماعرفتها , لكن أني نصيحتي الشخصية لي كل أب مادخلش ولدك لي السياسة وبعد أبنك عن بيئــــتك السياسية وبعد بيئــــتك السياسية عن منزلك وعن أبنائك وخلي أبنك يقرأ ويطمح للي يبيه مش ضيعله عمره باش أنتا تحطه سفير او غير , لانه حياخد مرات المنصب ولاكن ماحيعيش بمتعة وأبداع
والله أعلم
حبيب نينو